इटहरी, ९ पुस । अष्ट्रेलियन सहयोग नियोग र युएनडिपीको आर्थिक सहयोगमा सुनसरीका विभिन्न गाविसमा लघुउद्यम सहकारी सञ्चालन भएका छन् ।

कार्यक्रम सञ्चालन भएको छोटो अवधिमा नै जिल्लाको ४८ गाविसमध्ये ३३ गाविस र तीन नगरपालिकाको गरिबी न्यूनीकरणमा केन्द्रित रहेर लुघ उद्यमशीलता कार्यक्रममार्फत उद्यम सिकाउ हातमा सीप दिएर महिलालाई क्रियाशील बनाउने काम भइरहेको छ ।

जिल्लाको महेन्द्रनगरमा आभा लघुउद्यमी बचत तथा ऋण सहकारी संस्थाले मासिक बचतसँगै आफ्ना सेयर सदस्यलाई उचित ब्याजदरमा ऋण परिचालन गर्दै आएको सो सहकारीकी व्यवस्थापक निर्मलादेवी घिमिरेले जानकारी दिनुभएको छ ।
विशेषगरी उद्यमशीलताको विकासमा जोड दिएर समूह निर्माण गर्दै सोही समूहलाई आयआर्जनसम्बन्धी सीपमूलक र स्वरोजगार सिर्जना गर्ने तालिम दिएर दक्ष बनाउनु लघुउद्यम विकास कार्यक्रमको मुख्य उद्देश्य रहेको कार्यक्रम अधिकृत राजकुमार राई बताउनुहुन्छ ।

लघुउद्यम विकास कार्यक्रममा सहभागी भएकाकै सक्रियतामा जिल्लाको नौ स्थानमा सहकारी संस्था विधिवत् दर्ता गरेर सञ्चालनमा ल्याउने कार्य भइसकेको राईले जानकारी दिनुभयो ।

लघुउद्यम विकास कार्यक्रमले विष्णुपादुका गाविसमा बेसार उत्पादन प्रशोधन र बिक्री गर्ने उद्देश्यले सहकारी संस्था सञ्चालनमा ल्याएको छ ।

लघुउद्यम विकास कार्यक्रमले हालसम्म जिल्लाको कार्यक्रम सञ्चालित गाविस र नगरपालिकाका दुई हजार ४०० महिला तथा पुरुषलाई तालिम दिई सकेको छ । तालिम प्राप्त गरिसकेकालाई ३७५ वटा समूहमा आबद्धता गराउने कार्य पनि सम्पन्न भइसकेको छ ।

आभाले स्थापना भएदेखि नै गाउँघरमा राम्ररीसेवा दिन थालेको आभाका पूर्व व्यवस्थापक नरनाथ चौलागाईंले बताउनुभएको छ । करोडाँैको कारोबार गर्न सफल भइसकेका लघुउद्यम विकास कार्यक्रममा समेटिएका सहकारीमध्ये कोसी बाढी प्रभावित क्षेत्रका हरिपुर र श्रीपुर गाविसमा एकएक वटा तरकारीजन्य वस्तु सङ्कलन प्रशोधन बजार प्रवद्र्धन गर्ने सहकारी संस्था क्रियाशील रहेका छन् ।