चण्डेश्वरी साकोसले ११ प्रतिशतमै कर्जा दिने, अवधि १० वर्षसम्म

काभ्रे : बनेपा स्थित चण्डेश्वरी बचत तथा ऋण सहकारी संस्थाले सदस्यहरुलाई ११ प्रतिशत वार्षिक व्याजदरमै कर्जा प्रवाह गर्ने भएको छ ।

संस्थाले महिला सदस्यहरुको शिप र दक्षता अनुसार लघु उद्यम, घरेलु उद्यम तथा व्यवसायमार्फत महिलाहरुलाई स्वरोजगार तथा उद्यमी बनाउनको लागि ११ प्रतिशतमै कर्जा प्रवाह गर्न लागेको हो ।
कर्जाको अवधि १० वर्षसम्म राख्न सकिने संस्थाले जनाएको छ । संस्थाले यस्तो कर्जा १५ लाख रुपैयाँसम्म दिने पनि जनाएको छ ।

सदस्यहरुले कागजात दिएको तीन कार्यदिन भित्रै कर्जा प्रवाह गर्ने समेत संस्थाले जनाएको छ । त्यसैगरी वाषिक ११ प्रतिशतमै व्यवसाय उत्थान कर्जा समेत प्रवाह गर्ने भएको छ । आर्थिक मन्दी एवं अन्य कारणले सदस्यको व्यवसायमा परेको असरलाई निर्मुलीकरण गरी व्यवसाय पुनःउत्थानका लागि यो योजना संस्थाले ल्याएको हो ।

त्यस्तै संस्थाले वार्षिक ११.५ प्रशितमा साना तथा मझौला उद्योग सहुलियत कर्जा पनि प्रवाह गर्दै आएको छ । यस योजनाको अधिकतम सिमा पनि १५ लाख रहेको छ ।

चण्डेश्वरी साकोस एशिया स्तरको ब्राण्ड प्राप्त संस्था हो । फागुन मसान्तसम्म संस्थाको सेयर पुँजी ११ करोड २६ लाख रहेको छ । त्यस्तै जगेडा कोषमा १३ करोड ७ लाख रहेको छ । कुल सम्पत्ति १ अर्ब ४१ करोड ७८ लाख रहेको संस्थाको संस्थागत पुँजी १३ करोड ३१ लाख रुपैयाँ रहेको छ । संस्थामा १० हजार ६१ जना सदस्य आवद्ध छन् । संस्थाको कुल बचत १ अर्ब ७ करोड र लगानी ९८ करोड २१ लाख रुपैयाँ रहेको छ । संस्थासँग ३५.८१ प्रतिशत तरलता रहेको छ ।