कोरोना प्रभाव : सुनौलो साकोसको बोल्ड डिसिजन, घटायो २ प्रतिशत कर्जाको ब्याजदर

पोखरा, ७ चैत्र

सदस्यहरुलाई राहत दिने उद्देश्यले सुनौलो बचत तथा ऋण सहकारी संस्था (सुनौलो सकोस) ले कर्जाको ब्याजदर घटाएको छ ।

विश्वव्यापी रुपमा फैलिएको कोरोना भाइरसका कारण पर्यटन क्षेत्र लगायत सम्पूर्ण आर्थिक क्षेत्रमा नकारात्मक प्रभाव परेपछि सहकारीले कर्जाको ब्याजदर घटाउने निर्णय गरेको अध्यक्ष टीकाराम सापकोटाले जानकारी दिनुभयो ।

कोरोना भाइरसका कारण पर्यटन क्षेत्रले धेरै क्षति ब्यहोर्नुपरेको र थोरै भएपनि सदस्यलाई राहत होस भन्ने उद्देश्यले ऋणको ब्याजदर घटाउने निर्णय गरिएको उहाँले बताउनुभयो । ऋणको प्रकृति हेरी १४ देखि १६ प्रतिशतसम्म ब्याज लिने गरिएकोमा अब १२ देखि १४ प्रतिशतसम्म व्याज लिइने सहकारी संस्थाका व्यवस्थापक गिरिधारी ढकालले जानकारी दिनुभयो ।

बिहीबार बसेको सञ्चालक समितिको बैठकले पुराना प्रदान गरिएको ऋण र नयाँ ऋण दुबैमा लागु हुने गरी ब्याजदर घटाउने निर्णय गरिएको ढकालले बताउनुभयो । यस संस्थामा १ हजार ३ सय सदस्य आवद्ध छन् । सहकारीले १७ करोड रुपैयाँ ऋण लगानी गरेको छ ।